Rom 3 | JAE | STEP | Amboac ondoc, lau Juda oc têtap moasiŋ sa êlêlêc lau samuc su me masi. Me sêsa lauŋa tau naŋ ŋanô amboac ondoc.

Romans 3

1 Amboac ondoc, lau Juda oc têtap moasiŋ sa êlêlêc lau samuc su me masi. Me sêsa lauŋa tau naŋ ŋanô amboac ondoc. 2 Op, moasiŋ to ŋanô tokaiŋ-tokaiŋ taêsam. Moasiŋ ŋamataŋa tonec gebe Anôtô kêkêŋ nê mêtê gêdêŋ êsêac. 3 Ŋagêdô embe sêkêŋ êwiŋ atom, go amboac ondoc. Êsêacnêŋ sêkêŋ gêwiŋ atomŋa oc enseŋ Anôtônê lêŋ ŋaŋêŋ su me. 4 Masigoc. Ŋamalac samob dansaŋtêna. Anôtô taugeŋ eŋ ŋac biŋŋanôŋa kêtôm teto gêc gebe

“Nêm biŋ êwaka aôm sa gebe kôsôm jagêdêŋ,
ma lau embe sêmêtôc aôm, naŋ oc ôku êsêac tulu.”
5 Aêacnêŋ biŋ geo embe êwaka Anôtônê biŋgêdêŋ sa, naŋ tasôm asageŋ. Ma Anôtô embe êjac nê têtac ŋandaŋ sa, oc êŋgôm eso me masi. Biŋ tonaŋ kasôm kêtôm ŋamalacnêŋ kaucgoc. 6 Masigoc. Anôtô embe enseŋ tau amboac tonaŋ, oc êmêtôc ŋamalac samob nêŋ biŋ êtu katô amboac ondoc. 7 Ma amboac ondoc. Ŋoc biŋdansaŋ embe êwaka Anôtônê biŋŋanô sa e ênê ŋawasi êsa êlêlêc su, naŋ eŋ oc êmêtôc aê amboac ŋac sec teŋ me. 8 Embe amboac tonaŋ, go tasôm biŋ alôb-alôb gebe “Daŋgôm secmaŋ, gebe sec ênam ŋanô ŋajamôŋ.” Tasôm amboac tonaŋ me. Lau ŋagêdô sêgôliŋ biŋ kêpi aêac ma sêsôm gebe aêac asôm ŋalô tau tonaŋ. Lau tonaŋ oc sêndac nêŋ mêtôc naêndêŋgeŋ.

Ŋac gêdêŋ teŋ gêmoa atom

9 Amboac ondoc, aêac Juda atap moasiŋ ŋajam sa êlêlêc su me. Masianô. Aêac asôm sugac gebe Juda to lau samuc samob sêsô sec ŋaŋaclai ŋalabu, 10 kêtôm teto gêc gebe

“Ŋac gêdêŋ teŋ gêmoa atomanô.
11 Ŋac tokauc teŋ gêmoa atom,
ma ŋac gesom Anôtôŋa teŋ gêmoa atom.
12 Samob sêkac tauŋ su e têtu sec samobgac.
Ŋac têtac wapômŋa teŋ gêmoa atom, masi samucgeŋ.
13 Êsêacnêŋ aweŋsuŋ kêtôm sêawa gêŋa.
Imbeleŋ geno-geno biŋdansaŋ e ŋawasi laŋgwageŋ.
Gêdôŋôlic kêsabaŋ moac ŋamalic auc.
14 Aweŋsuŋ kêpuc boa ŋawaô ma biŋ ŋaclai gêjam auc.
15 Sêlêtigeŋ gebe sêkêc dec siŋ.
16 Êsêacnêŋ lêŋ kepeŋ senseŋ gêŋ popocŋa ŋawaô
to sêŋgôm launêŋ ŋalêlôm ŋawapac êsaŋa,
17 ma sêjam kauc lêŋ sê wamaŋa.
18 Êsêac sêkô Anôtô laŋônêm, mago têtêc eŋ atom.”
19 Aêac tajala gebe biŋ samob, taŋ biŋsu kêsôm naŋ, kêkanôŋ êsêac, taŋ sêmoa biŋsu ŋalabu naŋ. Biŋsu êmbôc êsêac aweŋ auc ma ŋamalac samob sêjala nêŋ keso, taŋ sêgôm gêdêŋ Anôtô naŋ, gebe 20 Anôtô kêmasaŋ ŋamalac samob nêŋ biŋ e gêlic êsêac têtu lau gêdêŋ kêtu ŋamalac sêgôm biŋsu ŋanô kêsaŋa nec atom. Biŋsu ŋakoleŋ tageŋ tonec gebe êtôc aêacnêŋ sec ênêc awêgeŋ êndêŋ aêac.

Takêŋ êwiŋ Kilisiŋa gêjam aêac kêsi

21 Galoc lêŋ tec Anôtô kêsa gebe êmansaŋ ŋamalacnêŋ biŋ e êlic êsêac têtu lau gêdêŋ, mêŋgeoc tau lasê. Geoc tau lasê kêpi biŋsu ŋalêŋ atom. Mose tau nê biŋsu to propete sêwa biŋ tau sa. 22 Anôtô kêmasaŋ ŋamalacnêŋ biŋ e gêlic êsêac têtu lau gêdêŋ naŋ gêgôm kêtu sêkêŋ gêwiŋ Jesu Kilisiŋa. Êsêac samob, taŋ sêkêŋ gêwiŋ Kilisi naŋ, têtap moasiŋ tonaŋ sa kêtômgeŋ, 23 gebe ŋamalac pebeŋ sêgôm sec tec sêjac jaê Anôtônê ŋawasi. 24 Mago Anôtô kêmoasiŋ êsêac to kêmasaŋ êsêacnêŋ biŋ e gêlic êsêac têtu lau gêdêŋ ŋaômageŋ, gêgôm kêtu Kilisi Jesu kêsi êsêac suŋa. 25 Anôtô tau kêkêŋ Kilisi kêtu da wamaŋa gebe ênê dec enseŋ lau, taŋ sêkêŋ gêwiŋ eŋ naŋ, nêŋ sec su. Biŋ tonaŋ gêwa Anôtô kêmasaŋ ŋamalacnêŋ biŋ e gêlic êsêac têtu lau gêdêŋ ŋalêŋ sa. Gêdêŋ têm gêmuŋŋa Anôtô gê ŋamalacnêŋ biŋ tôŋ ma gêwi nêŋ sec ŋabiŋ siŋ gêcŋa. 26 Mago galoc Anôtô gebe êwaka lêŋ kêmasaŋ ŋamalacnêŋ biŋŋa sa, ec tajala gebe eŋ ŋac gêdêŋ ma kêmasaŋ lau, taŋ sêkêŋ gêwiŋ Jesu naŋ, nêŋ biŋ e gêlic êsêac têtu lau gêdêŋ.

27 Ma aêacnêŋ waeŋ tau gêc ondoc. Waeŋ tau gêbacnêgac. Biŋsu amboac ondoc geseŋ su. Biŋsu taŋ kêjatu aêac gebe tanam koleŋ me. Masianô. Biŋ takêŋ gêwiŋŋa. 28 Aêac tajala biŋ tonec kêtu tôŋ gebe Anôtô kêmasaŋ ŋamalacnêŋ biŋ e gêlic êsêac têtu lau gêdêŋ kêtu sêkêŋ gêwiŋŋageŋ, kêtu sêjam biŋsu ŋakoleŋŋa nec atom. 29 Anôtô kêtu Juda tauŋgeŋ nêŋ Anôtô me. Eŋ kêtu lau samuc nêŋ Anôtô gêwiŋ atom me. Aec, lau samuc nêŋ gêwiŋgoc. 30 Anôtô tageŋ, tec êmansaŋ Judanêŋ biŋ e êlic êsêac têtu lau gêdêŋ êtu sêkêŋ gêwiŋŋa ma êmansaŋ lau samuc nêŋ êtu sêkêŋ gêwiŋŋa amboac tonaŋgeŋ. 31 Amboac tonaŋ aêac daseŋ biŋsu su kêtu takêŋ gêwiŋŋa me. Masigoc, aêac tatoc biŋsu sageŋ.